დასავლეთ საქართველოს ყველა რეგიონის მსგავსად, აზიურ ფაროსანასთან ბრძოლის ღონისძიებები აჭარაშიც აქტიურად მიმდინარეობს
აჭარის სოფლის მეურნეობის სამინისტროში გამართულ შეხვედრაზე, აჭარის სოფლის მეურნეობის მინისტრ ზაზა შავაძეს სურსათის ეროვნული სააგენტოს აზიურ ფაროსანასთან ბრძოლის მართვის ცენტრის უფროსმა დავით აშორდიამ მავნებელთან ბრძოლის მიმდინარე და დაგეგმილ ღონისძიებებზე დეტალური ინფორმაცია მიაწოდა. აღინიშნა, რომ, წინა წლების წარმატებული გამოცდილების გათვალისწინებით, გაგრძელდება მჭიდრო თანამშრომლობა ადგილობრივი ხელისუფლებების წარმომადგენლებთან. ამავდროულად, შედეგების გასაუმჯობესებლად, ხელვაჩაურში, მავნებელთან ბრძოლის ცენტრში, დამატებითი სპეციალიზებული ტექნიკა იქნება მობილიზებული. „დამატებითი ტექნიკა საშუალებას მოგვცემს, უწყვეტ რეჟიმში გავაგრძელოთ პრევენციული და კონტროლის ღონისძიებები“, - აღნიშნა აჭარის სოფლის მეურნეობის მინისტრმა ზაზა შავაძემ. სამინისტროში გამართული შეხვედრის შემდეგ, ფაროსანასთან ბრძოლის მართვის ცენტრის უფროსმა დავით აშორდიამ და აჭარის სოფლის მეურნეობის მინისტრის მოადგილე ლევან დავითაძემ ხელვაჩაურში, მავნებელთან ბრძოლის ცენტრში მობილიზებული ტექნიკა დაათვალიერეს და რეგიონული ჯგუფის უფროსებთან სამუშაო შეხვედრა გამართეს. დასავლეთ საქართველოს ყველა რეგიონის მსგავსად, მავნებელთან ბრძოლის ღონისძიებები აქტიურად მიმდინარეობს აჭარაშიც. ყველა ადმინისტრაციულ ერთეულში განთავსებულია მონიტორინგის სისტემები და სპეციალური სადგურები („მოიზიდე და გაანადგურე” სადგურები), ტარდება წერტილოვანი წამლობები ცივი შესხურების მეთოდით, სოფლების ტერიტორიები თერმული ნისლის ტექნოლოგიით მუშავდება.
იხილეთ სრულად„ერთიანი ჯანმრთელობა, ერთიანი მომავალი: მეცნიერებაზე დაფუძნებული სურსათის უვნებლობა“ საქართველოში სურსათის მსოფლიო დღე აღინიშნა
გარემოს დაცვისა და სოფლის მეურნეობის მინისტრის მოადგილე კახა კაკაბაძე სურსათის უვნებლობის მსოფლიო დღის აღსანიშნავ ღონისძიებას დაესწრო. ღონისძიება FAO-ს (გაეროს სურსათისა და სოფლის მეურნეობის ორგანიზაცია) ორგანიზებით გაიმართა. სურსათის უვნებლობის მსოფლიო დღის წლევანდელი გზავნილია „ერთიანი ჯანმრთელობა, ერთიანი მომავალი: მეცნიერებაზე დაფუძნებული სურსათის უვნებლობა“.მისასალმებელი სიტყვით გამოსვლის დროს, კახა კაკაბაძემ ყურადღება სურსათის უვნებლობის მდგრადი სისტემის ჩამოყალიბებაში მეცნიერების როლზე გაამახვილა„სურსათის უვნებლობა საზოგადოებრივი ჯანმრთელობის, ეკონომიკური განვითარებისა და სოციალური კეთილდღეობის საკითხია, რომლის გარშემო სამთავრობო სექტორი, საერთაშორისო პარტნიორები, აკადემიური წრეები და ბიზნესი საერთო მიზნისთვის ერთიანდებიან. მინდა განსაკუთრებული ყურადღება გავამახვილო გარემოს დაცვისა და სოფლის მეურნეობის სამინისტროსა და FAO-ს ხანგრძლივ და ნაყოფიერ თანამშრომლობაზე. ჩვენმა ერთობლივმა ძალისხმევამ შესაძლებელი გახადა, განგვეხორციელებინა არაერთი მნიშვნელოვანი ინიციატივა, გვემუშავა სურსათის უვნებლობის პოლიტიკის მნიშვნელოვან საკითხებზე, მათ შორის, სურსათის უვნებლობის 2025-2028 სტრატეგიაზე, რომელიც უკვე დამტკიცდა“, - განაცხადა კახა კაკაბაძემ. სურსათის ეროვნული სააგენტო სურსათის უვნებლობის მსოფლიო დღეს დაარსებიდან აღნიშნავს და უერთდება გაეროს სურსათისა და სოფლის მეურნეობის ორგანიზაციის (FAO) მთავარ გზავნილებს. „სურსათის ეროვნული სააგენტოს თითოეულ თანამშრომელს ყოველდღიური საქმიანობით საკუთარი წვლილი შეაქვს სურსათის უვნებლობის მაღალი სტანდარტების დამკვიდრებასა და მომხმარებლის ინტერესების დაცვაში. სააგენტო ყოველწლიურად 36 ათასამდე სახელმწიფო კონტროლს ახორციელებს, მონიტორინგის პროგრამის ფარგლებში სხვადასხვა მაჩვენებელზე 7 ათასამდე ნიმუშს იკვლევს. აღსანიშნავია, რომ სააგენტოს მიერ გააქტიურებული კონტროლის და ქმედითი ღონისძიებების შედეგად, ბოლო წლებში მნიშვნელოვნად არის შემცირებული სურსათში ისეთი ნარჩენები, როგორიცაა ტყვია, სუდანი, მალაქიტი, ანტიბიოტიკები, პესტიციდები“, - აღნიშნა სურსათის ეროვნული სააგენტოს უფროსის მოადგილემ გიორგი იაკობაშვილმა. FAO-ს წარმომადგენელმა საქართველოში რაიმუნდ იელემ საკუთარ გამოსვლაში ყურადღება გაამახვილა საფრთხეების იდენტიფიცირების პროცესში მეცნიერების მნიშვნელობაზე. „მეცნიერება ჩვენი ძალისხმევის ქვაკუთხედია, რომელიც საშუალებას გვაძლევს, გამოვავლინოთ საფრთხეები, შევაფასოთ რისკები და შევიმუშაოთ მტკიცებულებებზე დაფუძნებული სტანდარტები. მიზანი, რომ სურსათის უვნებლობის სტანდარტები საქართველოში გლობალურ სტანდარტებს შეესაბამებოდეს, უფრო ძლიერია, ვიდრე ოდესმე. ჩვენს პარტნიორებთან ერთად ვმუშაობთ სურსათის უვნებლობის მდგრადი სისტემის შესაქმნელად, რომელიც უზრუნველყოფს უფრო ჯანსაღ მომავალს”, - აღნიშნა რაიმუნდ იელემ.ღონისძიების ფარგლებში გაიმართა პანელური დისკუსია. სურსათის უვნებლობის მსოფლიო დღისადმი მიძღვნილ ღონისძიებას ესწრებოდნენ პარლამენტის აგრარულ საკითხთა კომიტეტის თავმჯდომარე გელა სამხარაული, დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელი პაატა იმნაძე, სურსათის ეროვნული სააგენტოს, სოფლის მეურნეობის ლაბორატორიის, სამეცნიერო-კვლევითი ცენტრის და აკადემიური წრეების წარმომადგენლები. სურსათის უვნებლობის მსოფლიო დღე გაეროს სურსათისა და სოფლის მეურნეობის ორგანიზაციის ინიციატივით ყოველწლიურად აღინიშნება.
იხილეთ სრულადქობულეთის მუნიციპალიტეტის დაბა ოჩხამურში სურსათის ეროვნული სააგენტო ჯილეხის საწინააღმდეგო ღონისძიებებს ახორციელებს
სურსათის ეროვნული სააგენტოს აჭარის რეგიონული სამმართველოს ვეტერინარებმა, შემოსული ინფორმაციის საფუძველზე, ქობულეთის მუნიციპალიტეტის დაბა ოჩხამურში 2 სული მსხვილფეხა საქონლის პათოლოგიური მასალა აიღეს და აკრედიტებულ ლაბორატორიაში გადააგზავნეს. ლაბორატორიული კვლევით ჯილეხი დადასტურდა. შედეგების მიღებისთანავე სურსათის ეროვნულმა სააგენტომ ეპიზოოტიურ კერაში მყისიერად დაიწყო ყველა შესაბამისი სამუშაოების განხორციელება, მათ შორის, დადგენილი რადიუსის ფარგლებში დაავადების ამთვისებელი ცხოველების სავალდებულო ვაქცინაციაც. ამ დროისთვის, 700 ზე მეტი პირუტყვია ვაქცინირებული. საკარანტინო ზონაში დაუშვებელია ცხოველების და ტრანსპორტისა გადაადგილება, ცხოველის დაკვლა და ხორცის გამოყენება, ცხოველური პროდუქტების დამზადება, გამოტანა, რეალიზაცია. 2025 წელს, მთელი ქვეყნის მასშტაბით, ჯილეხის პროფილაქტიკური ვაქცინაციის ფარგლებში უკვე აცრილია 305 844 სული დაავადების ამთვისებელი ცხოველი. სააგენტოს მიერ ჩატარებული ყოველწლიური ვაქცინაციის და ერთიანი ჯანმრთელობის ფარგლებში განხორციელებული საინფორმაციო კამპანიების შედეგად, ცხოველის ჯილეხით დაავადების შემთხვევები, 2013 წელთან შედარებით, 94%-მდეა შემცირებული. ჯილეხი (ციმბირული წყლული) - ინფექციური დაავადებაა, რომლითაც ავადდებიან შინაური და გარეული ცხოველები. ჯილეხით ავადდება ადამიანიც. ადამიანის დაინფიცირება ძირითადად დაავადებული ცხოველის დაკვლის, მისი ხორცის გამოყენებით ან დაბინძურებული ნიადაგიდან ხდება. დამატებითი ინფორმაცია ჯილეხის შესახებ: https://nfa.gov.ge/Ge/AnimalDiseases/Details/2
იხილეთ სრულადდასავლეთ საქართველოში ფაროსანას საწინააღმდეგო წერტილოვანი წამლობები მიმდინარეობს
მავნებლის მონიტორინგის შედეგების გათვალისწინებით, დასავლეთ საქართველოს მუნიციპალიტეტებში ფაროსანას საწინაღმდეგო სპეციალური სადგურების („მოიზიდე და გაანადგურე“) განთავსება და ცივი შესხურების მეთოდის გამოყენებით წერტილოვანი შეწამვლა მიმდინარეობს. სურსათის ეროვნული სააგენტოს აზიური ფაროსანას საწინააღმდეგო მართვის ცენტრის ჯგუფები, ფუტკრის დაცვის მიზნით, სადგურებს მხოლოდ არაყვავილოვან (რომელზეც ფუტკარი არ მიდის) მცენარეებზე ამონტაჟებენ. სამუშაოების დაწყებამდე, მოსახლეობის წინასწარ ინფორმირება გზავნილების სისტემის მეშვეობით ხდება. აღსანიშნავია, რომ ტემპერატურის მატების და მავნებლის გავრცელების შედეგების გათვალისწინებით, დაიგეგმება ტყის მასივების და ჯაგნარების წამლობის კომპლექსური ღონისძიებები; სოფლის ტერიტორიები კი ეგრეთ წოდებული თერმული ნისლის ტექნოლოგიით დამუშავდება.
იხილეთ სრულად
