სსიპ სურსათის ეროვნული სააგენტო

მენიუ

სურსათის ეროვნულმა სააგენტომ ვეტერინართა პროფესიული დღე მასშტაბური კონფერენციით აღნიშნა

გარემოს დაცვისა და სოფლის მეურნეობის მინისტრის მოადგილე კახა კაკაბაძემ ვეტერინარებს პროფესიული დღე მიულოცა და ხაზი გაუსვა მათ წვლილს ქვეყნის ეპიზოოტიური კეთილსაიმედოობის  უზრუნველყოფაში. „ვეტერინარები ცხოველების დროული ვაქცინაციითა და მათ ჯანმრთელობაზე  ზედამხედველობით უზრუნველყოფენ მომხმარებელს უვნებელი სურსათით და, შესაბამისად, იცავენ ადამიანების ჯანმრთელობას. ვეტერინარიის როლი უმნიშვნელოვანესია როგორც სოფლის მეურნეობის მდგრადი განვითარების, ასევე სასურსათო უსაფრთხოებისთვის“,  - აღნიშნა კახა კაკაბაძემ. სურსათის ეროვნული სააგენტოს უფროსმა ზურაბ ჩეკურაშვილმა  მადლობა გადაუხადა ვეტერინარებს გაწეული შრომისთვის და აღნიშნა, რომ მათი საქმიანობის ინდიკატორი ზოონოზური დაავადებების ბოლოდროინდელი სტატისტიკაა.„შემცირებულია ცოფისა და ჯილეხის შემთხვევები. 2023 წელს გამოვლინდა ცოფით დაავადების 85 შემთხვევა, 2024 წელს - 26. მიმდინარე წლის ოთხი თვის მონაცემებით, გამოვლენილია 2 ფაქტი, რაც გაცილებით ნაკლებია ამავე პერიოდის შარშანდელ მონაცემებთან. დაავადება „თურქულის“ კონტროლის ევროპული კომისიის გადაწყვეტილებით, გადავედით თურქულთან ბრძოლის მე-3 საფეხურზე, რაც იმას ნიშნავს, რომ ცხოველთა რეგულარული ვაქცინაციის შედეგად საქართველო კეთილსაიმედო ქვეყნების ჩამონათვალში ჩაეწერა“, - აღნიშნა ზურაბ ჩეკურაშვილმა. ღონისძიებას  ცხოველთა ჯანმრთელობის დაცვის მსოფლიო ორგანიზაციის (WOAH)  ევროპის რეგიონული წარმომადგენელი ბუდიმირ  პლავსიჩი,  ასევე აზერბაიჯანის და სომხეთის შესაბამისი უწყებების წარმომადგენლები  ესწრებოდნენ. კონფერენციაზე ხაზი გაესვა ქვეყნებს შორის  მჭიდრო თანამშრომლობის  მნიშვნელობას, რაც ხელს უწყობს  რეგიონში ეპიზოოტიური კეთილსაიმედოობის უზრუნველყოფას და რაშიც დიდი წვლილი სწორედ  საქართველოს ვეტერინარულ სამსახურს მიუძღვის.ქართველ ვეტერინარებს პროფესიული დღე მიულოცა ვეტერინარიის მსოფლიო ასოციაციის (WVA) პრეზიდენტმა ჯონ დი იანმაც.  „ვეტერინარიის მსოფლიო დღის წლევანდელი გზავნილია „ცხოველთა ჯანმრთელობას  უზრუნველყოფს გუნდი’”, რაც აერთიანებს ვეტერინარებს, პარაპროფესიონალებს,  სამთავრობო უწყებების, მარეგულირებელი ორგანოების წარმომადგენლებს და ფართო საზოგადოებას, რომლებიც ძალისხმევას არ იშურებენ როგორც ცხოველების, ისე ადამიანების ჯანმრთელობისა და კეთილდღეობის უზრუნველსაყოფად. ამ კუთხით ვეტერინარების წვლილი ფასდაუდებელია“, -აღნიშნა ვეტერინარიის მსოფლიო ასოციაციის (WVA) პრეზიდენტმა ვიდეომილოცვაში.კონფერენციის მონაწილეებმა 2025 წლის პრიორიტეტული მიმართულებები განიხილეს და ახალ რეგულაციაზე იმსჯელეს, რომლის მიხედვითაც 2026 წლის პირველი იანვრიდან ვეტერინარების სერტიფიცირება სავალდებულო ხდება. აღნიშნული ხელს შეუწყობს საერთაშორისო სტანდარტებთან დაახლოებული ვეტერინარული მომსახურების განვითარებას.ღონისძიებას აღმასრულებელი და საკანონმდებლო ხელისუფლების,  დარგობრივი ასოციაციების წარმომადგენლები, ფერმერები და სტუდენტები ესწრებოდნენ. დამსახურებულ ვეტერინარებსა და სტუდენტებს სიმბოლური საჩუქრები გადაეცათ. გაიმართა დისკუსია პოტენციურ დამსაქმებლებსა და სტუდენტებს შორის. ვეტერინარიის მსოფლიო დღე 2000 წელს ვეტერინარიის მსოფლიო ასოციაციის (WVA)  ინიციატივით დაწესდა და ყოველწლიურად აპრილის ბოლო შაბათს აღინიშნება. ამ დღის აღნიშვნის მიზანია, ხელი შეუწყოს პროფესიის პოპულარიზაციას, ხაზი გაუსვას  ვეტერინარების  წვლილს  საზოგადოებრივ ჯანდაცვაში და გაზარდოს ცნობიერება ვეტერინართა საქმიანობის შესახებ. 

იხილეთ სრულად

დასავლეთ საქართველოში ფაროსანას მონიტორინგის სისტემების განთავსება მიმდინარეობს

აზიური ფაროსანას გავრცელების მონიტორინგის მიზნით, სურსათის ეროვნული სააგენტოს მავნებელთან ბრძოლის მართვის ცენტრის სპეციალისტებმა სპეციალური სისტემების (ხაფანგების) განთავსება დაიწყეს.  ამ ეტაპზე, აღნიშნული პროცესი დასავლეთ საქართველოს ყველა მუნიციპალიტეტში აქტიურად მიმდინარეობს.   „მავნებლის  გარკვეული რაოდენობის დაფიქსირებისთანავე  დაიწყება კონტროლის ღონისძიებები. დასავლეთ საქართველოში მობილიზებული   სპეციალიზებული ტექნიკის მეშვეობით, ტერიტორიები ცივი შესხურებით  და თერმული ნისლის მეთოდებით დამუშავდება. აღნიშნული პროცესი წლის ბოლომდე გაგრძელდება“, - აღნიშნა  ფაროსანასთან ბრძოლის მართვის ცენტრის უფროსმა ლაშა შალამბერიძემ.    მავნებელთან ბრძოლის  სახელმწიფო პროგრამის ფარგლებში, მთელი ქვეყნის  მასშტაბით დაგეგმილია 8000-მდე სპეციალური ხაფანგის განთავსება; მავნებელთან ბრძოლის  საკოორდინაციო შტაბში  შექმნილია მონაცემთა ელექტრონული ბაზა, მონიტორინგის შედეგები აისახება ინტერაქტიულ რუკაზე.  ღონისძიებები, მუნიციპალიტეტების მიხედვით,  მონიტორინგის ანალიზის შედეგებზე დაყრდნობით იგეგმება. 

იხილეთ სრულად

სააღდგომო დღესასწაულის მოახლოებასთან დაკავშირებით, სურსათის ეროვნული სააგენტო სამომხმარებლო ბაზარს ინტენსიურად ამოწმებს

 სააგენტოს ინსპექტირების ჯგუფები კვერცხის სარეალიზაციო, სასაწყობე და მწარმოებელ ბიზნესოპერატორებს, საცხობებს და საკონდიტროებს მთელი ქვეყნის მასშტაბით აკონტროლებენ. შემოწმებისას ყურადღება ექცევა წარმოების პროცესში სანიტარიულ-ჰიგიენური სტანდარტების, სურსათის შენახვის პირობების, ვადების და მომხმარებლისთვის  სურსათის შესახებ ინფორმაციის მიწოდების წესის დაცვის საკითხებს.სურსათის ეროვნული სააგენტო მოუწოდებს მოსახლეობას, არ შეიძინოს კვერცხი და მაღალი რისკის სურსათი (ხორცი, თევზი, რძის ნაწარმი) სავაჭრო ადგილებში, სადაც არ არის დაცული ჰიგიენური ნორმები და რეალიზაციის პირობები.  აღსანიშნავია, რომ მიმდინარე წელს, ინსპექტირება და დოკუმენტური შემოწმება განხორციელდა კვერცხის 41 მწარმოებელთან; ერთი ბიზნესოპერატორი რეგისტრაციის არქონის გამო დაჯარიმდა. ამავდროულად, საკონდიტროებში განხორციელდა 175 შემოწმება. გამოვლინდა 10 სამართალდარღვევა, რაზეც სააგენტომ კანონმდებლობით გათვალისწინებული ღონისძიებები განახორციელა 

იხილეთ სრულად

დასავლეთ საქართველოში ფაროსანას საწინააღმდეგო ღონისძიებები იწყება

სურსათის ეროვნული სააგენტოს აზიური ფაროსანას საწინააღმდეგო ღონისძიებების მართვის ცენტრში მიმდინარე წლის სამოქმედო გეგმა განიხილეს. მართვის ცენტრის უფროსმა ლაშა შალამბერიძემ სააგენტოს სპეციალისტებთან და ჯგუფის ხელმძღვანელებთან შეხვედრაზე მავნებლის საწინააღმდეგო ღონისძიებების დეტალებზე ისაუბრა და ყურადღება გაამახვილა იმ სამუშაოებზე, რომლებიც ინტენსიური წამლობების დაწყებამდე უნდა ჩატარდეს. „იწყება „მონიტორინგის ხაფანგების“, ფერომონიანი ხაფანგების და „მოიზიდე და გაანადგურე სადგურების“ განთავსება. მონიტორინგის შედეგების გათვალისწინებით, დასავლეთ საქართველოს  ყველა რეგიონის ადმინისტრაციულ ერთეულში ჩატარდება წერტილოვანი წამლობები ცივი შესხურებით.  სპეციალიზებული ტექნიკა სრულად არის მობილიზებული“, - აღნიშნა ლაშა შალამბერიძემ.სურსათის ეროვნული სააგენტო აზიური ფაროსანას საწინააღმდეგო ღონისძიებებს სხვადასხვა მიმართულებით მიმდინარე წელსაც მასშტაბურად განახორციელებს.  მავნებელთან საბრძოლველად მოსახლეობის აქტიური ჩართულობა უმნიშვნელოვანესია; შესაბამისად,  სააგენტოს სპეციალისტები მოსახლეობის ინფორმირებას აქტიურად გააგრძელებენ. სურსათის ეროვნული სააგენტო კიდევ ერთხელ მოუწოდებს მოსახლეობას, დაამუშაონ ბაღები და აგროღონისძიებები  სპეციალისტების მიერ რეკომენდებული პრეპარატებით დაიწყონ.

იხილეთ სრულად