საიტი მუშაობს სატესტო რეჟიმში

სურსათის ეროვნული სააგენტო

მენიუ

ცხოველთა დაავადებების პრევენციის საკითხებზე ფერმერებისთვის საინფორმაციო შეხვედრები იმართება

სურსათის ეროვნული სააგენტოს ვეტერინარები, ადგილობრივი ხელისუფლების ჩართულობით, საჩხერისა და ონის მუნიციპალიტეტებში მოსახლეობას შეხვდნენ და მესაქონლეობაში არსებული გამოწვევები განიხილეს.ცხოველების სათანადო მოვლა-შენახვის, ფერმებში  ვეტერინარულ-სანიტარიული წესების დაცვისა და დაავადებების პრევენციისათვის უმნიშვნელოვანესია ფერმერთა ცნობიერების ამაღლება. „სააგენტო საინფორმაციო შეხვედრებს რეგულარულად მართავს.  მიღებული ინფორმაცია და ცოდნა ეხმარება ფერმერს, შეამციროს   დაავადებების გავრცელების რისკები, თავიდან აიცილოს ცხოველების დაავადებებით გამოწვეული ეკონომიკური ზარალი", - აღნიშნა სააგენტოს ვეტერინარიის დეპარტამენტის უფროსის მოადგილემ,  იოსებ მენთეშაშვილმა.სააგენტოს წარმომადგენლებმა დაინტერესებულ პირებს მიაწოდეს ინფორმაცია იმ სახელმწიფო პროგრამების შესახებ, რომლის ფარგლებშიც ხორციელდება პირუტყვის უფასო ვაქცინაცია სხვადასხვა დაავადებაზე. მოსახლეობის მეტი ჩართულობის მიზნით, სააგენტოს წარმომადგენლებმა საინფორმაციო მასალები „კარდაკარის” პრინციპით დაარიგეს.

იხილეთ სრულად

ბიზნესოპერატორებს ბაკურიანში სურსათის უვნებლობის სტანდარტები გააცნეს

სურსათის ეროვნული სააგენტოს სპეციალისტებმა ბაკურიანში,   სასტუმროებისა და საზოგადოებრივი კვების ობიექტების  წარმომადგენლებს სურსათის უვნებლობის მოთხოვნების დაცვის საკითხებზე დეტალური ინფორმაცია მიაწოდეს.შეხვედრაზე ხაზგასმით აღინიშნა, რომ გააქტიურებული  ტურისტული  სეზონის პირობებში უმნიშვნელოვანესია, მაქსიმალურად  იყოს დაცული  სურსათის უვნებლობის  დადგენილი სტანდარტები. სურსათის ეროვნული სააგენტოს სურსათის უვნებლობის სპეციალისტებმა ბიზნესსექტორის წარმომადგენლებს დეტალურად განუმარტეს HACCP-ის სტანდარტის დანერგვის, ობიექტის ინფრასტრუქტურის მოწყობის საკითხები, ზოგადი ჰიგიენის წესები და კანონმდებლობით გათვალისწინებული მოთხოვნები. აღინიშნა, რომ სააგენტო ღიაა რეგულარული თანამშრომლობისათვის, ეფექტიანი კომუნიკაცია კი ხელს უწყობს ბიზნესსექტორის ინფორმირებულობის გაზრდას და თანამედროვე  სტანდარტების დანერგვას, რაც მომხმარებლის ინტერესების დაცვის ერთ-ერთი მთავარი პირობაა.  საინფორმაციო შეხვედრა ბაკურიანის განვითარების სააგენტოს ჩართულობით, საზოგადოებრივი ცენტრის შენობაში გაიმართა.

იხილეთ სრულად

კალიების საწინააღმდეგოდ, აღმოსავლეთ საქართველოში 80 ათასი ჰექტარი ფართობი უკვე დამუშავებულია

აღმოსავლეთ საქართველოში კალიებთან ბრძოლის პროცესი ინტენსიურად მიმდინარეობს. კახეთის რეგიონში, დედოფლისწყაროს მუნიციპალიტეტში, იტალიური და მაროკოული  კალიების განსაკუთრებით დიდი რაოდენობა აღინიშნება, რაც საფრთხეს უქმნის ამ ტერიტორიაზე არსებულ მრავალწლოვან და ერთწლოვან სასოფლო-სამეურნეო კულტურებს.  სურსათის ეროვნული სააგენტოს უფროსი ზურაბ ჩეკურაშვილი კალიების საწინააღმდეგო ღონისძიებების მიმდინარეობას ადგილზე გაეცნო.  სააგენტოს მცენარეთა დაცვის სპეციალისტები, სპეციალიზებული ტექნიკითა და პრეპარატებით ინტენსიურად ამუშავებენ ფართობებს. ფერმერების განცხადებით, გატარებული ღონისძიებების შედეგად,  მავნებლის რაოდენობა შემცირდა, რაც ხელს უწყობს ნათესების გადარჩენას. აღმოსავლეთ საქართველოში, კალიების საწინააღმდეგოდ 80 ათასი ჰექტარი ფართობი უკვე დამუშავებულია, მათ შორის, კახეთში 21 000 ჰა, ქვემო ქართლში 45 000 ჰა, მცხეთა-მთიანეთსა და შიდა ქართლში 14 000 ჰა. მაროკოული და იტალიური კალია არის მავნებელი, რომელიც აზიანებს მარცვლოვან, ბოსტნეულ-ბაღჩეულ და მრავალწლოვან კულტურებს,  იკვებება მცენარის მწვანე საფარით და, ხშირად, მთლიანად ანადგურებს ნათესებსა და ნარგავებს.

იხილეთ სრულად

აზიურ ფაროსანასთან ბრძოლის ღონისძიებებისა და შედეგების გაცნობის მიზნით, დასავლეთ საქართველოში მედია-ტური მოეწყო

სხვადასხვა მედია საშუალების წარმომადგენლები საკოორდინაციო მართვის  ცენტრის მუშაობას გაეცნენ, დაათვალიერეს  მობილიზებული ტექნიკა და  მონიტორინგის სისტემები. აზიური ფაროსანას წინააღმდეგ მსოფლიოს სხვა ქვეყნებში არსებული ბრძოლის მეთოდებისა და საქართველოს  გამოცდილების შესახებ სურსათის ეროვნული სააგენტოს მცენარეთა დაცვის სპეციალისტებმა და  მოწვეულმა მეცნიერებმა ისაუბრეს. სურსათის ეროვნული სააგენტოს უფროსის, ზურაბ ჩეკურაშვილის განცხადებით, მავნებლის წინააღმდეგ ბრძოლის პროცესში უმნიშვნელოვანესია მოსახლეობის ჩართულობა, მათი ინფორმირებულობის გაზრდა, რაშიც გადამწყვეტი როლი სწორედ მედიასაშუალებებს აკისრიათ. მედიატურის ფარგლებში, ჟურნალისტებმა ოზურგეთის მუნიციპალიტეტში მშენებარე თხილის საშრობი დაათვალიერეს. ასევე, დაესწრნენ  სურსათის ეროვნული სააგენტოს მიერ  თხილის მწარმოებელთა ასოციაციის ფერმერებისთვის სპეციალური შესაწამლი აპარატების გადაცემის პროცესს.აზიურ ფაროსანასთან ბრძოლის ღონისძიებები შემუშავებული სახელმწიფო პროგრამის შესაბამისად მიმდინარეობს. დასავლეთ საქართველოში მობილიზებულია სპეციალიზებული ტექნიკა, რომლის მეშვეობითაც ფართობები თერმული ნისლისა და ცივი შესხურების მეთოდებით მუშავდაბა. სახელმწიფო პროგრამის ფარგლებში, მიმდინარეობს მონიტორინგი და სპეციალური სადგურების დამონტაჟება. ღონისძიებები თვითმმართველობებთან კოორდინირებულად ტარდება. მუდმივად იმართება საინფორმაციო შეხვედრები ფერმერებთან. სახელმწიფოს მიერ გატარებული კომპლექსური ღონისძიებების შედეგად, ბოლო წლებში, მავნებლის რაოდენობა მნიშვნელოვნად შემცირდა. 

იხილეთ სრულად