კახეთში კალიების წინააღმდეგ ბრძოლა ავიაციით გრძელდება

სურსათის ეროვნულმა სააგენტომ კახეთში საშიში მავნებლის -  იტალიური კალიის წინააღმდეგ ავიაციით წამლობა დაიწყო. ღონისძიებებს სოფლის მეურნეობის მინისტრი ზაზა გოროზია და სააგენტოს უფროსი დავით კობერიძე დაესწრნენ და შირაქის ველზე წამლობით სამუშაოებში თავადაც მიიღეს მონაწილეობა.

აღნიშნული ღონისძიება  სახელმწიფო მიზნობრივი პროგრამის „მცენარეთა დაცვა და ფიტოსანიტარიული კეთილსაიმედოობის\" ფარგლებში მიმდინარეობს. ავიაციის გამოყენებით შეიწამლება სამანქანო დანადგარებით მიუდგომელი ფართობები, სასოფლო-სამეურნეო კულტურები და საძოვრები.  სამუშაოები ჩატარდება  6 000 ჰექტარზე.

ავიაციის პარალელურად, სურსათის ეროვნული სააგენტოს მობილური რეაგირების ჯგუფის სპეციალისტები მავნებლის ძლიერი გავრცელების კერებში წამლობას სპეციალური სამანქანო დანადგარების ე.წ. მიკრონეიერების გამოყენებით ახორციელებენ.

ამ ეტაპისთვის აღმოსავლეთ საქართველოში დამუშავებულია 2954 ჰა დაზიანებული ფართობი. მათ შორის, კახეთის რეგიონში - 2484, ხოლო ქვემო და შიდა ქართლის ტერიტორიაზე 670 ჰა ფართობი.